Home शहरं नाशिक अर्धवेळेतच दुकाने ‘लॉकडाउन’

अर्धवेळेतच दुकाने ‘लॉकडाउन’



दुकानदारांसह ग्राहकही संभ्रमात B

B…

म. टा. प्रतिनिधी, नाशिक

गर्दी आटोक्यात आणण्यासाठी दुकानांचा वेळ वाढविण्याचा एकत्रित निर्णय जिल्हा, महापालिका आणि पोलिस प्रशासनाने घेतला आहे. दुकानदार व ग्राहकांसाठी हा निर्णय दिलासादायक असला तरीही या निर्णयाच्या पहिल्याच दिवशी दुकाने सुरू ठेवण्याबाबतच्या सूचनेमध्ये थोडा संभ्रम निर्माण झाला. परिणामी वाढीव वेळ मिळूनसुद्धा दुकाने गुरुवारी (दि. ११) सायंकाळी पाच वाजेच्या सुमारास बंद करण्यात आली. यामुळे प्रशासनाने नागरिकांमधील संभ्रम दूर करून अर्थचक्र सुरळीत करण्याची गरज व्यक्त होत आहे.

सम-विषम अशा वर्गात विभागणी केलेल्या दुकानांमध्ये पुन्हा एकदा गर्दी होण्यास सुरुवात झाली आहे. यामुळे नागरिकांचा सुरक्षित वावर धोक्यात येऊन भविष्यात समस्या वाढू नये, याकरिता दुकानांचा कालावधी मर्यादित न ठेवता तो वाढविण्याचा निर्णय पोलिस, जिल्हाधिकारी व मनपा प्रशासनाने समन्वयाने घेतला आहे. परंतु, गुरुवारी सायंकाळी शहरात ही दुकाने नेहमीप्रमाणे सायंकाळी ५ वाजताच बंद झालेली बघण्यास मिळाली. वेळ वाढवून मिळाल्याबाबत मात्र दुकानदार व ग्राहकांमध्ये संभ्रम दिसून आला.

शहरातील गर्दीची बाजारपेठ असणाऱ्या शालिमार, मेनरोड आदी परिसरात पाच वाजेच्या सुमारास दुकानदारांची दुकाने बंद करण्यासाठी तारांबळ उडाली. परिसरातील फेरीवाल्यांनी सवयीप्रमाणे मांडलेली दुकाने पाच वाजेदरम्यान काढण्यास सुरुवात केली. अनेकांनी परिसरातील छोट्या बोळींमध्ये हातगाड्या लपविण्यास सुरुवात केली, तर दुकानदारांनी दुकाने बंद करण्यास सुरुवात केली. दुकानांसाठी वेळ वाढवून देण्याची सूचना असली तरीही अचानक पोलिसांनी पेट्रोलिंग केल्यास गोंधळ होऊ नये याकरिता शालिमार, मेनरोड परिसरात उत्स्फूर्तपणे पाच वाजताच दुकानांचे ‘शटर डाउन’ झाले. सिडकोसह काही उपनगरांमध्ये पोलिसांनी पेट्रोलिंग करीत दुकाने पाच वाजेदरम्यान बंद करण्याच्या सूचना केल्याचे चित्र होते.

दुकानांच्या वाढीव वेळेसंदर्भातील सूचनांमध्ये निर्धारित वेळ या शब्दाने काहीसा संभ्रम अनेकांमध्ये निर्माण झाला होता. मात्र तो संभ्रम आता नाहीसा झाला आहे. लॉकडाउन अगोदर जशी दुकाने सुरू होती, तशीच ती यापुढेही सुरू राहतील. मात्र, त्यासाठी जिल्हाधिकाऱ्यांनी दिलेले सम-विषम रचना आणि कॅन्टोन्मेंट परिसरातील नियमांचेही पालन दुकानदार-ग्राहकांना करावे लागणार आहे.

– अमोल तांबे, पोलिस उपायुक्त

..

अनेक दिवसांपासून सायंकाळी पाच वाजेपर्यंतच दुकाने सुरू ठेवण्याची परवानगी होती. मात्र आता प्रतिबंधित क्षेत्र वगळता शहर व ग्रामीण भागातील दुकाने सायंकाळी पाच वाजेनंतरही सुरू ठेवता येणार आहेत. एकाचवेळी होणारी गर्दी टाळण्याचा उद्देश यामागे आहे. हे निर्बंध शिथिल केल्यानंतर गुरुवार पहिला दिवस होता. हळूहळू व्यावसायिक व नागरिकांसाठी हे सोयीचे होईल व सायंकाळी पाच वाजेनंतरही दुकाने खुली राहतील.

– सूरज मांढरे, जिल्हाधिकारी

मटा भूमिका

दुकाने रात्री नऊ वाजेपर्यंत सुरू ठेवण्याबाबत जिल्हा, पोलिस व महापालिका प्रशासनाने एकत्रित निर्णय घेतला खरा मात्र पहिल्याच दिवशी निर्णयाचा फज्जा उडाला. दुकाने नेहमीप्रमाणे पाच वाजताच बंद करण्याचा फतवा पोलिसांनी काढला आणि पुन्हा एकदा निर्बंधाबाबत संभ्रम वाढला. दुकानदार व ग्राहकांचा हा संभ्रम दूर करून प्रशासनाने अर्थचक्र सुरळीत करण्यावर भर द्यावा, ही अपेक्षा.



Source link

LEAVE A REPLY

Please enter your comment!
Please enter your name here

Most Popular

Recent Comments