कल्याण- डोंबिवली: गाफीलपणाचा फटका – the blow of negligence

ठाणे, कल्याण-डोंबिवली व मिरा-भाईंदर, अंबरनाथ या ठाणे जिल्ह्यातील महत्त्वाच्या पालिका क्षेत्रांमध्ये पुन्हा दहा दिवसांचा कडेकोट लॉकडाउन जाहीर करण्याची वेळ प्रशासनावर येऊन ठेपली. नवी मुंबईत प्रतिबंधित क्षेत्रात त्याची अंमलबजावणी सुरू झाली आहे. सुमारे २४ लाखांच्या ठाणे महापालिकेच्या शहरी क्षेत्रात लॉकडाउन जाहीर करण्यावरून राजकीय नेतृत्व, महापालिका प्रशासन आणि पोलिस यांच्यात एकवाक्यता नव्हती. त्यातून गेले तीन दिवस गोंधळ सुरू होता.

एकदा तर पूर्ण लॉकडाउनचे ट्विट पोलिसांच्या अधिकृत ट्विटर हँडलवरून प्रसृत झाले आणि ते मागे घेण्याची वेळ आली. महाराष्ट्र अनलॉकिंग म्हणजेच व्यवहार पूर्ववत करण्याच्या दिशेने जात असताना, पुन्हा लॉकडाउनची मात्रा लागू करावी का, यावरून राजकीय नेतृत्वात द्विधा मनस्थिती दिसते. ठाणे जिल्ह्यातील करोनाबाधित मृत्यूंची संख्या हजाराच्या पलीकडे गेली आहे, तर बाधित ३५ हजारांच्या घरात. ठाणे, नवी मुंबई, कल्याण-डोंबिवली येथे रोज दोनशे ते चारशे-साडेचारशे या संख्येने भर पडत आहे.

डोंबिवलीत सुरुवातीस एका विवाहाचे प्रकरण बरेच गाजले. गर्दी जमवण्यावरचे निर्बंध धुडकावणे किती महागात पडू शकते, त्याचा प्रत्यय वऱ्हाडींना आला. लॉकडाउन असतानाही कित्येक बाजारपेठांमध्ये वारेमाप गर्दी व्हायची. ठाण्यात मुंब्रा, कळवा येथे दाटीवाटीच्या भागात करोनाचा प्रादुर्भाव वाढला होताच; परंतु लोकमान्यनगर, सावरकरनगर, वागळे इस्टेट, वर्तकनगर या अशाच दाट लोकवस्तीत सुरुवातीस सुरक्षित वावराचे गांभीर्य राखले गेले नव्हते, त्या भागात नंतर बाधितांची संख्या कित्येकपट वाढली.

नवी मुंबईचे कृषि उत्पन्न बाजार समितीचे घाऊक बाजार, कल्याणचा फुलबाजार, अंबरनाथ-बदलापूरचे कारखाने, उल्हासनगरचे उद्योग, ठाण्यातील लघुद्योग या सर्व गोष्टींना या बंदचा फटका बसेल. या परिसरातून लाखोंच्या संख्येने कर्मचारीवर्ग रोज मुंबई व परिसरात जातो. या सर्वांनी काय करायचे, कसे व्यवहार करायचे, याबाबत कायम संभ्रमावस्था राहिली. या शहरांच्या गरजा, त्यांचे व्यवहार यांना अनुकूल अशा योजना कराव्या लागतील. कित्येक दिवस गाफील राहिल्याचा हा फटका आहे आणि त्यातूनच गोंधळ झाला आहे. आरोग्यमंत्र्यांनी ठाणे जिल्ह्यात लक्ष घालण्याची वेळ झपाट्याने टळून चालली आहे.