पालघर हत्याकांड : पालघर प्रकरणः ही तर आता नराधमांची भूमी- सुमीत राघवन – actor sumeet raghvan is numb on palghar mob lynching incident

मुंबई- पालघर जिल्ह्यात जमावानं तीन प्रवाशांना चोर समजून दगडानं ठेचून हत्या केल्याच्या घटनेवर अभिनेता सुमीत राघवन प्रचंड संतापला असून सोशल मीडियावर त्याने याबद्दल प्रखर प्रतिक्रियाही दिली. ‘मी सुन्न झालोय. जे घडलं ते अत्यंत भीषण, भीतिदायक, लाजिरवाणं आहे. यापुढे महाराष्ट्र ही संतांची, वीरांची भूमी आहे असं बोलण टाळूया. याउलट ही नराधमांची भूमी आहे असं म्हणणं जास्त योग्य ठरेल. ही घटना महाराष्ट्राच्या प्रतिमेला लागलेला काळा डाग आहे.

करोना- वादग्रस्त वक्तव्यामुळे एजाज खानला अटक

या ट्वीटमध्ये सुमीतने उद्धव ठाकरे, राज्य पर्यावरण मंत्री आदित्य ठाकरे, गृहमंत्री अनिल देशमुख आणि पालघर पोलीस यांना टॅग केलं आहे. एवढंच नाही तर सुमीतने सलग तीन ट्वीट केले. पहिल्या ट्वीटमध्ये तो म्हणाला की, ‘मी तो व्हिडिओ पाहिला नसता तर बरं झालं असतं. आता ती दृष्य माझ्या डोळ्यासमोरून जात नाहीत. एखाद्या म्हाताऱ्या माणसाची जमाव दगडी मारून हत्या कशी करू शकतं. म्हाताऱ्याचं संरक्षण करण्याऐवजी पोलीस त्यांच्यापासूनच लांब पळत होते. आपण कुठे चाललोय हा प्रश्न आता माझ्या डोक्यात पुढील अनेक वर्ष घोळत राहणार आहे.’

यानंतरच्या ट्वीटमध्ये त्याने लिहिले की, ‘जमाव इतका क्रूर आणि निर्दयी कसा असू शकतो. जमावातील एकानेही हे सर्व थांबवण्याचा प्रयत्न कसा केला नाही… मला वाटतंय की कोणी तरी केलाच असेल.. बरोबर ना? मलला खरंच कळत नाहीये या सगळ्याकडे मी कशापद्धतीने पाहू.. जरा थांबूया.. विचार करूया आणि स्वतःलाच प्रश्न विचारूया.. जे झालं ते योग्य होतं का?

हॉलिवूड- बॉलिवूड आले एकसाथ, नवीन कंपनी तयार

पालघरच्या डहाणू तालुक्यातील गडचिंचले येथे गुरुवारी १६ एप्रिल रोजी रात्री ही घटना घडली होती. दाभाडी-खानवेल मार्गावरून तीन जण कारमधून नाशिकच्या त्र्यंबकेश्वरकडे जात होते. यावेळी शेकडो ग्रामस्थ रस्त्यावर जमा झाले. त्यांनी ही कार थांबवत प्रवाशांची विचारपूस करण्यास सुरुवात केली. मात्र प्रवाशांनी माहिती देण्याच्या आधीच काही लोकांनी गाडीच्या दिशेने दगडफेक सुरू केली. त्यानंतर या जमावाने कारमधील तिघांनाही लाठ्याकाठ्यांनी बेदम चोप देत, त्यांना दगडाने ठेचून मारले. या हत्याकांडानं खळबळ उडाली होती.