Home संपादकीय सूर न गवसलेली ‘असुर’

सूर न गवसलेली ‘असुर’


स्लग – नेटगृहांच्या पडद्यावर

‘सीरियल किलर’ या विषयावर भारतीय परिप्रेक्ष्यात नोंद घेण्यासारखं विशेष काम आजवर झालेलं नाही, ती संधी असतानाही ‘असुर’ने गमावली आहे.

अमोल उद्गीरकर

जगभरातल्या देशांमध्ये गुन्हेगारांच्या खतावण्यात सीरीयल किलर्स सापडतात. क्रिमिनल सायकॉलॉजी नावाची मानसशास्त्राची एक शाखा आहे. गुन्हेगारांच्या वर्तणुकीमागच्या मानसशास्त्राचा अभ्यास ही शाखा करते. त्या शाखेमध्ये जे संशोधन झालं आहे, त्यानुसार सीरिअल किलर्स हे ‘गॉड कॉम्प्लेक्स’नं पछाडलेले असतात. त्यांना असं वाटत असतं की, सर्वसामान्य माणसाला लागू असणारे नियम त्यांना लागू पडत नाहीत. अनेक सिरिअल किलर्सनी आपल्या कृष्णकृत्यांचा कबुलीजबाब देताना पोलिसांना असं सांगितलंय की, देवच त्यांना असं काम करण्याच्या सूचना देत होता. एखाद्या व्यक्तीचं आयुष्य आपल्या कृत्यावर निर्भर आहे, याची जाणीव त्यांना ‘कीक’ देते. निरपराध अनोळखी माणसांना मारण्यामागे अशा प्रकारे आधिभौतिक नव्हे, तर मानसिक प्रेरणा कार्यरत असतात. आपण काही निष्पाप लोकांचा जीव घेतला आहे, या पश्चात्तापाचा लवलेशही त्यांच्या वागण्या-बोलण्यात नसतो, असा त्यांची उलटतपासणी करणाऱ्या पोलिसांचा अनुभव आहे. सीरियल किलर म्हणजे काही तरी विदेशी फॅड आहे, असा समज अनेक भारतीयांचा असतो. रामन राघव सोडून आपल्याकडे सीरियल किलर झालेच नाहीत, असं आपल्याला वाटत असतं. पण तसं नाहीये. आपल्याकडे अनेक सीरियल किलर होऊन गेले आहेत. बीयर मॅन, निठारी हत्याकांडातला पंधेर, ऑटो शंकर, सायनाईड मोहन आणि असे कित्येक सीरियल किलर भारतात होऊन गेले आहेत. गुप्तधनाच्या हव्यासातून घडलेलं मानवत हत्याकांडही गाजलं होतं. पण क्वचित अपवाद वगळता भारतीय चित्रपट आणि इतर भारतीय कलाकृती या विषयाची सखोल मांडणी करण्यात खूपच कमी पडले आहेत. ‘असुर-वेलकम टू युअर डार्क साईड ‘ या वेब सीरिजकडून या वेगळ्या विषयाची सखोल मांडणी होईल अशी अपेक्षा होती; पण ‘असुर’ ही प्रयत्न म्हणून बरा असली, तरी अशी वेगळी मांडणी करण्यात खूपच कमी पडते.

वर म्हटल्याप्रमाणे ‘असुर’ ही सीरिज, म्हणजे सीबीआयच्या टीमकडून एका सीरियल किलरचा छडा लावण्याचा प्रवास आहे. दिल्ली आणि इतर काही शहरांमध्ये खुनाचं सत्र चालू होतं. हे खून अतिशय वेगळ्या आणि क्रूर पद्धतीने करण्यात येत आहेत. खून होणाऱ्या व्यक्तींमधला परस्परसंबंध सीबीआयला लक्षात येत नसला तरी, खुन्याने जाणीवपूर्वक मागे सोडलेल्या काही धाग्यांमुळे या सगळ्या खूनसत्रामागे एकच व्यक्ती आहे, हे धनंजय राजपूत (अर्शद वारसी) आणि त्याच्या हाताखाली काम करणाऱ्या चौकशी पथकाला कळून चुकतं. शेवटी राजपूतचाच माजी सहकारी निखिल नायर (बरून सोबती) अमेरिकेमधून या खुन्याचा शोध लावण्यासाठी भारतात परत येतो. भूतकाळातल्या एका घटनेमुळे राजपूत आणि नायर यांचे मार्ग वेगळे झालेले असतात. खुन्याचा शोध चालू असतानाच धनंजय राजपूतच्या घटस्फोटित पत्नीचाच खून होतो आणि खुद्द चौकशी पथकाचा प्रमुखच संशयाच्या घेऱ्यात येतो. धनंजय राजपूत पत्नीच्या खुनाच्या आरोपाखाली जेलमध्ये गेल्याने, तपासाची जबाबदारी निखिल नायरवर पडते. पण अतिशय जीनियस असणारा सीरियल किलर अशा काही घटना घडवून आणतो, की निखिलच मोठ्या संकटात सापडतो आणि खूनसत्र तसंच चालू राहतं. शेवटी अटकेत असणारा धनंजय राजपूत जेलमधूनच चौकशीची सूत्र स्वतःच्या हातात घेतो. निखिल नायर त्या संकटातून बाहेर पडतो का? धनंजय राजपूत सीरियल किलरचा छडा लावतो का? सीरियल किलर कोण असतो आणि तो हे का करत असतो? या सगळ्या प्रश्नांची उत्तरं ‘असुर’ ही वेब सीरिज बघताना मिळतात.

‘असुर’ ही वेब सीरिज ‘voot’ या प्लॅटफॉर्मवर बघता येऊ शकेल. या सीरिजचे एकूण आठ एपिसोड्स असून प्रत्येक एपिसोड जवळपास पाऊण तासाचा आहे. शेवटचा एपिसोड मात्र एका तासाचा आहे.

‘असुर’ची सगळयात चांगली गोष्ट म्हणजे, या सीरिजमधला सीरियल किलर. या सीरियल किलरला स्वतःचं असं तत्त्वज्ञान आहे. हे तत्त्वज्ञान वेद आणि पुराणांच्या संयोगातून तयार झालं आहे. हे तत्त्वज्ञान वर-वर अराजकतावादी वाटत असलं, तरी ते प्रत्यक्षात तसं नाहीये. सीरिजमधली तीन मुख्य पात्र आणि त्यांचे बरेचसे सबप्लॉट्स फार उत्तम जमून आले आहेत. धनंजय राजपूत आणि निखिल नायर यांच्याव्यतिरिक्त अजून एक महत्त्वाचं पात्र म्हणजे बनारसमध्ये एका पंडिताच्या पोटी जन्माला आलेला मुलगा शुभ. शुभ हा लहानपणापासूनच अतिशय उच्च बुद्ध्यांक असणारा मुलगा. पण प्रेक्षकांना लहानपणीचा शुभ फक्त माहीत आहे. ह्या शुभभोवती सगळी सीरिज फिरते. सीरिजमध्ये दोन ट्रॅक समांतर चालतात. लहान शुभचा त्याच्या वाराणसीमधल्या वास्तव्याचा, त्याच्या सतत त्याच्यावर कोपलेल्या वडिलांचा आणि त्याच्या गडद भूतकाळाचा, हा ट्रॅक खूप छान जमून आलेला आहे. दुसरा ट्रॅक वर्तमानकाळातला. धनंजय राजपूत, निखिल नायर आणि त्यांच्या टीमचा, सीरियल किलरचा छडा लावण्याच्या प्रयत्नांचा. हा ट्रॅक पहिल्या ट्रॅकइतका जमून आलेला नसला, तरी एकदमच वाईटही नाहीये. पण निखिल नायरच्या वैयक्तिक आयुष्यातले पेचप्रसंग हे एकूण स्क्रिनप्लेच्या वेगाला अडथळे आणतात. अजूनच वाईट भाग म्हणजे निखिल नायरचा हा ट्रॅक खूपच सरधोपट आहे. सीरिजमधले पहिले पाच भाग उत्कंठावर्धक आणि श्वास रोखून ठेवायला लावणारे आहेत. मात्र ज्याप्रमाणे चांगला होण्याची क्षमता असणारे अनेक सिनेमे ‘सेकंड हाफ कर्स’ला बळी पडतात. त्याप्रमाणे ‘असुर’चे शेवटचे तीन भागही या शापाला बळी पडतात. सहाव्या एपिसोडपासून सिरिजची गाडी रुळावरून खाली घसरते. समांतर चालणारी अनेक कथानकं कन्क्लुड करताना पटकथा लेखक गौरव शुक्ला, निरेन भट, विनय चावला आणि दिग्दर्शक ओणी सेनची दमछाक होते. शेवटचा एपिसोड तर सिरिज चांगली होण्याची अपेक्षा पार धुळीस मिळवतो. सीरिजच्या पूर्वीच्या एपिसोडमधून प्रेक्षकांना पडलेल्या अनेक प्रश्नांची उत्तरं मिळतच नाहीत. उदाहरणार्थ सीरियल किलर, त्याने खून केलेल्या लोकांची करंगळी का कापत असतो? असे अनेक प्रश्न अनुत्तरित सोडून आणि उत्तरांच्या अपेक्षेने शेवटच्या एपिसोडपर्यंत आलेल्या प्रेक्षकांचा अपेक्षाभंग करून ही सीरिज संपते. निर्मात्यांना दुसऱ्या सीझनमध्ये हे कथानक पुढं न्यायचं आहे, असं गृहीत धरलं तरी एका चांगल्या होऊ शकणाऱ्या सीरिजचा इतका अर्धकच्चा शेवट मनाला पटत नाही.

दुसरी एक मोठी समस्या म्हणजे कास्टिंग. अर्शद वारसी आणि बरून सोबतीने आपल्या भूमिका चोख बजावलेल्या असल्या, तरी दुसऱ्या काही पात्रांचं कास्टिंग, अनेक चांगल्या परभाषांमधल्या वेब सीरिज कोळून प्यायलेल्या प्रेक्षकांसाठी स्पॉईलरचं काम करू शकतं. सीरिज बघताना ही कुठली पात्र आहेत, हे तुम्हाला कळेलच. सीरिजच्या जबरदस्त सिनेमॅटोग्राफीसाठी काही जास्तीचे गुण द्यायला हवेत. सीरिजमध्ये एरियल सिनेमॅटोग्राफीचा मनमुराद वापर करण्यात आला आहे आणि उंचावरून घेतलेली ही दृश्यं खूप परिणामकारक आहेत.

‘सीरियल किलर’ या विषयावर भारतीय परिप्रेक्ष्यात नोंद घेण्यासारखं विशेष काम आजवर झालेलं नाही. ‘असुर’ मध्ये या साचल्या तळ्यात दगड फेकून तरंग उठवण्याची क्षमता होती. पण शेवटच्या तीन एपिसोडमुळे हा प्रयत्न फसला. इतर भारतीय वेब सीरिजशी तुलना केली, तर ‘असुर’ ही ‘वासरात लंगडी गाय शहाणी’ या न्यायाने चांगली वाटू शकते. पण जेव्हा आपण सर्व ओटीटी प्लॅटफॉर्म्सवरच्या वेब सीरिजविषयी बोलत असतो, तेव्हा तुमच्या कामाची तुलना जगातल्या इतर भाषांमधल्या वेब सीरिजशी होत असते. क्राइम थ्रिलर या श्रेणीत तर अनेक चांगल्या सीरिज इतर भाषांमध्ये बनल्या आहेत. ‘माइंडहंटर्स’ सारख्या वेब सीरिजशी आपण ‘असुर’ची तुलना केली, तर आपल्याला या क्षेत्रात किती मजल मारायची आहे, याची टोचणी देणारी जाणीव होते!



Source link

LEAVE A REPLY

Please enter your comment!
Please enter your name here

Most Popular

India Innovation Index: ठाकरे सरकारने करून दाखवले!; ‘या’ यादीत महाराष्ट्राची दुसऱ्या स्थानी झेप – niti aayog announces india innovation index 2020 maharashtra ranked second

मुंबई: नीती आयोगाने २० जानेवारी २०२१ रोजी ' इंडिया इनोव्हेशन इंडेक्स २०२० ' हा आपला दुसऱ्या प्रकाशनाचा निकाल जाहीर केला असून यामध्ये तामिळनाडू...

Recent Comments