Bachat Gat: राज्यात ७ हजार बचतगटांनी तयार केले ६२ लाख मास्क – ahmednagar 7000 bachat gats made 62 lakh face masks during coronavirus crisis

अहमदनगर: करोना विषाणूचा संसर्ग रोखण्यात महत्वाच्या ठरणाऱ्या मास्कची निर्मिती राज्यात मोठ्या प्रमाणात करण्यात येत आहे. राज्यातील ७ हजारांहून अधिक बचतगटांनी तब्बल ६२ लाख मास्क तयार केले आहेत.

करोना व्हायरसचा प्रादुर्भाव रोखण्यासाठी मास्कचा वापर करण्याचे आवाहन सातत्याने केले जात आहे. करोनाचा संसर्ग जास्त असलेल्या शहरांतील नागरिकांना मास्क वापरणे बंधनकारक करण्यात आले आहे. त्यामुळे साहजिकच ‘मास्क’ला मागणी वाढली आहे. त्यामुळे राज्यातील बचतगट मोठ्या प्रमाणात मास्क तयार करत आहेत. महाराष्ट्र ग्रामीण जीवनोन्नती अभियानांतर्गत राज्यातील जवळपास ७ हजार ४२ बचतगटांनी आतापर्यंत ६२ लाख ६ हजार १०२ मास्क तयार केले आहेत. विशेष म्हणजे बहुतांश मास्कची विक्री सुद्धा करण्यात आली आहे.

दरम्यान, सध्या लॉकडाउनच्या काळात बचतगटांच्या अडचणी वाढल्या आहेत. या काळात बचतगटांचे कामकाज बंद आहे. उन्हाळ्यात अनेक बचतगट वाळवणाचे पदार्थ तयार करतात. मात्र, लॉकडाउनमुळे या पदार्थांना मागणी घटली आहे. त्यामुळे या काळात बचतगटांनी कापडी मास्क तयार करण्यास सुरुवात केली. राज्यात आतापर्यंत मोठ्या प्रमाणात मास्क तयार करण्यात आले आहेत. यामध्ये अमरावती विभागातील ३ हजार १३५ बचतगटांनी ११ लाख १९ हजार मास्क तयार केले आहेत. औरंगाबाद विभागात ९१० बचतगटांनी १२ लाख ३६ हजार, तसेच कोकण विभागातील ६५४ बचतगटांनी १० लाख २२ हजार, नागपूर विभागातील ८७६ बचतगटांनी ६ लाख ७५ हजार, नाशिक विभागातील ५९९ बचतगटांनी ९ लाख ४६ हजार आणि पुणे विभागातील ८६८ बचतगटांनी जवळपास १२ लाख ५ हजार मास्क तयार केले आहेत.