Home शहरं मुंबई Balasaheb Thorat: Maharashtra Alliance Stable, Says Balasaheb Thorat - आमची नाराजी नाहीच;...

Balasaheb Thorat: Maharashtra Alliance Stable, Says Balasaheb Thorat – आमची नाराजी नाहीच; आघाडी भक्कम: काँग्रेस


म. टा. प्रतिनिधी, मुंबई

‘राज्याच्या विकासासाठी आम्ही एकत्र आलो आहोत. आमची कोणतीही नाराजी नव्हती. महाविकास आघाडी भक्कम आहे आणि पाच वर्षे चांगले काम करेल’, असे काँग्रेसचे प्रदेशाध्यक्ष तथा महसूलमंत्री बाळासाहेब थोरात यांनी गुरुवारी मुख्यमंत्र्यांची भेट घेतल्यानंतर स्पष्ट केले. महाविकास आघाडी सरकारच्या निर्णय प्रक्रियेत स्थान मिळत नसल्याचे सांगत काँग्रेसच्या ज्येष्ठ नेत्यांनी अलिकडेच नाराजी व्यक्त केली होती. मात्र याबाबत घुमजाव करत थोरात यांनी या विषयाला पूर्णविराम लावला.

सरकारमध्ये आमची कोणतीही नाराजी नाही. मुख्यमंत्री उद्धव ठाकरे यांच्यासोबत गुरुवारी झालेल्या चर्चेत काही प्रशासकीय तसेच काही विभागाचे विषय होते. राज्यातील नागरिकांसंबंधित काही महत्त्वाच्या विषयांवर समोरासमोर सकारात्मक चर्चा झाली. प्रामुख्याने करोनाच्या संकटात अडकलेल्या गरिबांना कशी मदत करता येईल याविषयी ही चर्चा होती. तथापि कोणताही वैयक्तिक मुद्दा नव्हता, असे थोरात म्हणाले. तीन दिवसांच्या प्रतीक्षेनंतर काँग्रेस नेत्यांनी मुख्यमंत्र्यांची ‘मातोश्री’ बंगल्यावर भेट घेतली. थोरात यांच्यासह सार्वजनिक बांधकाममंत्री अशोक चव्हाण यांनी मुख्यमंत्र्यांना भेटून सकारात्मक चर्चा केली. याप्रसंगी शिवसेनेचे खासदार संजय राऊत आणि अनिल देसाई उपस्थित होते.

नाराजीचा विषय नव्हता. काही विषयांची समोरासमोर चर्चा व्हावी लागते. मोठ्या बैठकांमध्ये ही चर्चा होऊ शकत नाही. आज सकारात्मक चर्चा झाली. चर्चेचे विषय प्रशासकीय होते. विभागाच्या चर्चा होत्या. करोनाच्या संकटात गरीब माणूस अडचणीत आला आहे. त्याला कशी मदत करता येईल, याबाबत चर्चा होती. कोणताही वैयक्तिक मुद्दा नव्हता, असे थोरात यांनी सांगितले.

काँग्रेसचे नेते राहुल गांधी यांनी ‘न्याय’ योजना देशासाठी मांडली आहे. त्या योजनेची अंमलबजावणी देश पातळीवर होणे गरजेचे आहे. राज्यात गरीब माणूस अडचणीत आहे. त्याला राज्याकडून कशी मदत करता येईल. कोकणच्या वादळग्रस्त भागाचा दौरा आपण केला. तिथे फळबागांचे मोठ्या प्रमाणात नुकसान झाले आहे. नारळ, पोफळी जमीनदोस्त झाली आहे. त्याला एकर हेक्टर नव्हे, तर वेगळे निकष लावावे लागतील. त्यांना कशी मदत करायची यावरही चर्चा झाली, असे थोरात यांनी सांगितले

विकासनिधीचे समान वाटप व्हावे

विधान परिषदेच्या जागा वाटपाबाबत सत्ता स्थापन करतेवेळीच चर्चा झाली होती. समान वाटपाचे सूत्र ठरलेले आहे. त्यावर जास्त चर्चा करायची गरज नव्हती. कोणत्याही बैठकीत काँग्रेसला डावलले असे कुठे दिसले नाही. विकासनिधीच्या वाटपाचा विषय असतोच, या निधीचे समान वाटप असावे, अशी अपेक्षा थोरात यांनी व्यक्त केली.

मेहतांबाबत चर्चा नाही

राज्याचे मुख्य सचिव अजोय मेहता यांच्या कार्यपद्धतीवर दोन्ही काँग्रेसचे मंत्री नाराज असल्याच्या चर्चा आहे. त्याकडे लक्ष वेधता थोरात म्हणाले की, कोणत्याही अधिकाऱ्यांच्या बाबतीत आज आम्ही चर्चा केलेली नाही.



Source link

LEAVE A REPLY

Please enter your comment!
Please enter your name here

Most Popular

Recent Comments