coronavirus: लातूरमध्ये ६५ वर्षीय करोनाबाधित रुग्णाचा मृत्यू – coronavirus 65 year old covid 19 patient dies in latur

६५ वर्षीय करोनाबाधित व्यक्तीला मधुमेह, न्युमोनिया हे आजारही होते, अशी माहिती जिल्हा शल्यचिकित्सक डॉ. संजय ढगे यांनी दिली. उदगीर उपजिल्हा रुग्णालयात ते उपचार घेत होते. आज दुपारी त्यांचा मृत्यू झाला, असेही त्यांनी सांगितले. करोनामुळे मृत्यू झालेल्या व्यक्तींची संख्या दोन झाली आहे.

हसनाबादेतील वृद्धेला करोना

भोकरदन तालुक्यातील हसनाबाद येथील ६० वर्षीय महिलेचा चाचणी अहवाल करोना पॉझिटिव्ह आला आहे. ही महिला लॉकडाउननंतर २२ मार्च रोजी हसनाबाद येथून औरंगाबाद येथे मकसूद कॉलनीत राहण्यासाठी गेली होती. अस्वस्थ वाटू लागल्याने तिला औरंगाबाद येथील सरकारी रुग्णालयात उपचारासाठी दाखल करण्यात आले. तेथे तिचे स्वॅबचे नमुने प्रयोग शाळेकडे तपासणीसाठी पाठविण्यात आले होते. या महिलेचा अहवाल पॉझिटिव्ह असल्याची माहिती सूत्रांनी दिली. दरम्यान, औरंगाबादमधील घाटी रुग्णालयात उपचार घेत असलेल्या करोनाबाधित ६५ रुग्णांपैकी ३९ जणांची प्रकृती गंभीर असल्याचे जिल्हाधिकारी उदय चौधरी यांनी सांगितले.

लॉकडाउन शिथिलतेबाबत १९ मे नंतरच निर्णय

शहरातील करोना विषाणूची साखळी तोडण्यासाठी लॉकडाउनची कठोर अंमलबजावणी करण्यात येत असल्याचे सांगत १९ रोजी याबाबतचा संपूर्ण आढावा घेऊन लॉकडाउन शिथिलतेबाबत निर्णय घेणार असल्याचे जिल्हाधिकारी उदय चौधरी यांनी सांगितले. या शिवाय शहरातील १०० पेक्षा जास्त खाटा असलेल्या मोठ्या रुग्णालयांतील २५ टक्के खाटा या कोविड रुग्णांसाठी राखीव ठेवण्याचा निर्णय घेण्यात आला आहे.