नगरमध्ये आता करोनाचा वेगाने फैलाव होऊ लागला असून जिल्ह्यात आज दुपारी पुन्हा १९ रुग्ण आढळले आहेत. यामध्ये नगर शहरातील सात जणांचा समावेश आहे. त्यामुळे आतापर्यंत केवळ नगर महापालिकेच्या हद्दीमध्येच सापडलेल्या करोनाबाधितांची संख्या १६० झाली असून त्यापैकी हॉस्पिटलमध्ये सध्या उपचार घेत असलेल्या रुग्णांची संख्या ७८ आहे. रुग्ण वाढत असल्यामुळे नगर शहरामध्ये नालेगाव, तोफखाना, सिद्धार्थनगर व आडतेबाजार हे चार कंटेन्मेंट झोन केले आहे.
वाचाः मीरा- भाईंदरमध्ये पुन्हा लॉकडाऊन; फक्त ‘या’ सेवा राहणार सुरू
मुख्य बाजारपेठेचा परिसर सुद्धा कंटेन्मेंट व बफर झोनमध्ये आला असल्यामुळे ती देखील बंद आहे. मात्र, त्यानंतरही नगरमधील इतर भागातील गर्दी कमी होत नसल्याचे प्रकार समोर आले आहे. विशेष म्हणजे अनेकजण कोणतेही सोशल डिस्टन्सिंग न पाळता, तोंडाला मास्क न लावता विनाकारण फिरताना आढळत आहेत. त्यामुळे आता विनाकारण फिरणे टाळा अन्यथा सक्तीने लॉकडाऊन करण्याचा इशाराच जिल्हाधिकारी द्विवेदी यांनी दिला आहे. अत्यावश्यक काम असेल तरच चेहऱ्यावर मास्क घालून घराबाहेर पडावे. कोणत्याही परिस्थितीत करोना संसर्ग प्रादुर्भाव रोखण्यासाठी नागरिकांनी योग्य ती खबरदारी घेण्याचे आवाहनही त्यांनी केले आहे.
वाचाः ठाण्यात २ ते १२ जुलैपर्यंत कडेकोट लॉकडाऊन; ‘हे’ आहेत नवे नियम
प्लाझ्मा दान करण्यासाठी पुढे या
‘करोना बाधित रुग्णांवर उपचारासाठी प्लाझ्मा थेरपीचा वापर रुग्णांना फायदेशीर ठरत आहे. त्यामुळे करोनातून बरे झालेल्या रुग्णांनी अन्य रुग्णांच्या उपचारासाठी प्लाझ्मा दान करण्यासाठी पुढे यावे,’ असे आवाहन जिल्हाधिकारी राहुल द्विवेदी यांनी केले आहे. ‘रुग्ण बरे झाल्यानंतर १० दिवसानंतर आणि २८ दिवसाच्या आत प्लाझ्मा दान केले पाहिजे. त्यामुळे रुग्णांनी स्वतःहून पुढाकार घ्यावा. तेथील उपचार करणाऱ्या डॉक्टरांनीही त्यांचे समुपदेशन करून याचे महत्व पटवून द्यावे,’ असेही ते म्हणाले.
