Home मुंबई नवी मुंबई navi mumbai News : एपीएमसीतील पोलिसाला लागण - infection of the police...

navi mumbai News : एपीएमसीतील पोलिसाला लागण – infection of the police in apmc


म. टा. वृत्तसेवा, नवी मुंबई मुंबई पोलिसांच्या पाठोपाठ आता नवी मुंबईतील पोलिसांनादेखील करोनाची लागण होऊ लागल्याचे उघडकीस आले आहे. रविवारी एपीएमसी पोलिस ठाण्यातील ३१ वर्षीय पोलिसाची चाचणी पॉझिटिव्ह आली. त्यांच्यासोबत कर्तव्यावर असलेल्या अन्य आठ पोलिस कर्मचाऱ्यांना विलग करण्यात आले आहे. नवी मुंबई पोलिस दलातील पोलिस कर्मचाऱ्याला करोनाची लागण झाल्याची ही पहिलीच घटना असल्याने नवी मुंबई पोलिस दलात चिंतेचे वातावरण आहे. सध्या एपीएमसी मार्केटमध्ये मोठ्या प्रमाणात करोना पॉझिटिव्ह रुग्ण आढळून येत आहेत. त्यामुळे एपीएमसी मार्केट हॉटस्पॉट ठरला आहे. सानपाडा एमआयडीसी भागात राहणारे ३१ वर्षीय पोलिस कॉन्स्टेबल एपीएमसी पोलिस ठाण्यात कार्यरत असून गेल्या काही दिवसांपासून ते एपीएमसीतील दाणा बाजारात बंदोबस्तावर होते. शनिवारी त्यांना अस्वस्थ वाटू लागल्याने त्यांची चाचणी करण्यात आली. रविवारी त्यांचा अहवाल पॉझिटिव्ह आला. त्यामुळे त्यांच्यासोबत कर्तव्यावर असलेल्या आठ पोलिस कर्मचाऱ्यांना विलग करण्यात आल्याची माहिती वरिष्ठ पोलिस निरीक्षक सतीश निकम यांनी दिली. एपीएमसीतील दाणा बाजारात कर्तव्यावर असताना, त्यांना करोनाची लागण झाली असण्याची शक्यता निकम यांनी व्यक्त केली. दरम्यान, रविवारी महापालिकेच्या आरोग्य विभागास प्रलंबित असलेल्या अहवालांपैकी ३०७ अहवाल प्राप्त झाले. त्यापैकी २८२ अहवाल निगेटिव्ह आले. २५ जणांचे अहवाल पॉझिटिव्ह आले. अद्याप महापालिकेला ८४६ रुग्णांचे अहवाल प्राप्त होणे बाकी आहे. शनिवारी आढळून आलेल्या एकूण करोना बाधित रुग्णांपैकी नेरूळ येथील ९, वाशीमध्ये ९, तुर्भे येथे १, ऐरोली येथे १ व कोपरखैरणे येथील ५ रुग्णांचा समावेश आहे. दरम्यान, नवी मुंबईत कोविड-१९ची चाचणी केलेल्या नागरिकांची संख्या ४,०२६ झाली. त्यापैकी पॉझिटिव्ह ३१४, तर निगेटिव्ह २,८६६ रुग्ण आढळून आले. ८४६ रुग्णांचा तपासणी अहवाल अद्याप प्रलंबित आहे. नवी मुंबई महापालिका क्षेत्रात आतापर्यंत एकूण ५९८० नागरिकांचे घरीच विलगीकरण करण्यात आले, तर ७२० नागरिकांचे संस्थात्मक विलगीकरण करण्यात आले आहे. महापालिका क्षेत्रात सहा बाधितांचा मृत्यू झाला आहे. महापालिकेने शहरातील ७५ ठिकाणे बाधित क्षेत्रे म्हणून घोषित केली आहेत. आतापर्यंत ४८ रुग्ण करोनामुक्त झाले आहेत.



Source link

LEAVE A REPLY

Please enter your comment!
Please enter your name here

Most Popular

Recent Comments