Home मुंबई नवी मुंबई navi mumbai News: मृत्यूदर घटविण्यास प्राधान्य - priority in reducing mortality

navi mumbai News: मृत्यूदर घटविण्यास प्राधान्य – priority in reducing mortality


म. टा. विशेष प्रतिनिधी, मुंबई

राज्यातील विशेषत: मुंबई -पुण्यातला करोनामुळे होणारा मृत्यूदर कमी करणे आणि रुग्णांची संख्या दुप्पट होण्याचा कालावधी लक्षणीयरित्या वाढवणे याला प्राधान्य असून, यादृष्टीने केंद्रीय पथकाने केलेल्या सूचनांवर तातडीने अंमलबजावणी व्हावी, असे निर्देश मुख्यमंत्री उद्धव ठाकरे यांनी प्रशासनाला दिले.

मुंबई आणि पुण्याच्या केंद्रीय पथकांसमवेत मुख्यमंत्र्यांनी व्हिडीओ कॉन्फरन्सद्वारे चर्चा केली. या वेळी आरोग्यमंत्री राजेश टोपे देखील उपस्थित होते. या वेळी केंद्रीय पथकाने राज्य सरकार मोठ्या प्रमाणावर चाचण्या करत आहे त्यावर समाधान व्यक्त केले. सध्या राज्यात रुग्ण दुप्पट होण्याचा कालावधी सुमारे सात दिवसांचा आहे आणि तो १० दिवसांपेक्षा जास्त करण्याचे सध्या ठरविले आहे. मृत्यू झालेल्यांमध्ये ७८.९ टक्के रुग्णांमध्ये इतरही आजार होते तसेच मरण पावलेले रुग्ण हे ५१ ते ६० वयोगटातील आहेत, असे लक्षात आले आहे.

अतिरिक्त केंद्रीय सचिव मनोज जोशी यांच्या अध्यक्षतेखाली पाच जणांचे केंद्रीय पथक गेल्या तीन दिवसांपासून मुंबईत आहे. तर, केंद्रीय ऊर्जा मंत्रालयाचे अतिरिक्त सचिव संजय मल्होत्रा यांच्या नेतृत्वाखाली पाच सदस्यीय पथक पुणे आणि परिसराचा दौरा करत आहे. वैद्यकीय यंत्रणेचा आढावा घेण्याशिवाय या पथकांनी मदत शिबिरांमधल्या मजुरांच्या स्थितीचाही आढावा घेतला तसेच सूचनाही केल्या.

पीपीई किटबाबत सूचना

पीपीई किट्सची आवश्यकता पुढील काळात आणखी लागू शकते. त्यामुळे आता केंद्राने त्या तातडीने उपलब्ध करणे महत्त्वाचे आहे. काही स्थानिक कंपन्याही असे किट्स उत्पादित करत आहेत. मात्र, केंद्राने याबाबतीत त्वरित मार्गदर्शन करणे गरजेचे असल्याचे मुख्यमंत्री ठाकरे यांनी निदर्शनास आणून दिले. केंद्रीय पथकाने रुग्णालयांतील सुविधा, क्वारंटाईन पद्धती, चाचण्या व या अनुषंगाने दिलेल्या सूचनांवर मुंबई आणि पुणे येथील प्रशासनाने त्वरित कार्यवाही सुरू करावी, असेही मुख्यमंत्र्यांनी सांगितले.

अन्य राज्यांच्या तुलनेत जास्त चाचण्या

करोना नसलेल्या इतर आजारांच्या रुग्णांचे हाल होत आहेत अशा तक्रारी येताहेत, त्यामुळे तातडीने महापालिकेने अशा सर्व करोना उपचार करणाऱ्या आणि करोना नसलेल्या रुग्णांवर उपचार करणाऱ्या नॉन कोविड दवाखाने, रुग्णालये आणि फिव्हर क्लिनिक्सची माहिती सर्वसामान्यांना द्यावी, असे निर्देशही मुख्यमंत्र्यांनी मुंबई महापालिकेला दिले. यावेळी मुख्य सचिव अजोय मेहता यांनी महाराष्ट्रात केरळ व इतर राज्यांपेक्षा सहापट जास्त चाचण्या होत असल्याची माहिती दिली. मुंबई पालिका आयुक्त प्रवीण परदेशी यांनी सांगितले की, मुंबईत ५५ हजार चाचण्या झाल्या असून आज ४२७० चाचण्या दर १० लाख लोकांमागे झाल्या आहेत. ते म्हणाले की, सध्या मुंबईतल्या ३२६ ठिकाणी कंटोन्मेमेंट झोन्स असून ४४७ झोन्स इमारतींच्या परिसरात आहेत. इमारतीत असलेले झोन्स झपाट्याने कमी होत आहेत ही समाधानाची बाब आहे.





Source link

LEAVE A REPLY

Please enter your comment!
Please enter your name here

Most Popular

Recent Comments