Home शहरं नागपूर TikTok: ‘टिकटॉक’ बघू दिलं नाही; मुलानं विष पिऊन केली आत्महत्या - 17-year-old...

TikTok: ‘टिकटॉक’ बघू दिलं नाही; मुलानं विष पिऊन केली आत्महत्या – 17-year-old boy commits suicide after stopped watching tiktok on mobile


नागपूर : टिकटॉक बघण्यास मनाई केल्याने १७ वर्षीय मुलाने विष प्राशन करून आत्महत्या केली. ही घटना देवलापारमधील सिंदेवानी येथे घडली. गुरुदेव हिरामण भलावी, असे मृताचे नाव आहे. ८ जूनला गुरुदेव हा मोबाइलवर टिकटॉक बघत होता. त्याच्या वडिलांनी गुरुदेवला हटकले. ‘मोबाइलवर खेळत जाऊ नको, शेतात जाऊन काम करता जा’, असे ते गुरुदेवला म्हणाले. वडील रागावल्याने गुरुदेवने विष प्राशन केले. त्याला मेयो हॉस्पिटलमध्ये दाखल करण्यात आले. डॉक्टरांनी तपासून गुरुदेवला मृत घोषित केले. देवलापार पोलिसांनी आकस्मिक मृत्यूची नोंद करून तपास सुरू केला आहे.

चिमुकल्याला चिरडले

कारने दोन वर्षीय चिमुरड्याला चिरडून ठार केले. ही घटना बेल्यातील पोही येथे घडली. विराज प्रभाकर नेवारे,असे मृताचे नाव आहे. ३ जूनला सकाळी विराज हा घरासमोर शौचालयाला बसला होता. याचदरम्यान पांडुरंग अरतपायरे रा. खैरी याने एमएच-४०-बीजे-१७२० या क्रमांकाची कार मागे घेतली. चाकाखाली आल्याने विराज जखमी झाला. त्याला मेडिकल कॉलेज हॉस्पिटलमध्ये दाखल करण्यात आले. उपचारादरम्यान त्याचा मृत्यू झाला. बेला पोलिसांनी पांडुरंग याच्याविरुद्ध प्राणांतिक अपघाताचा गुन्हा दाखल केला आहे.

नदीत बुडून तीन मुलांचा मृत्यू

विविध ठिकाणी नदीत बुडून तीन मुलांचा मृत्यू झाला. पहिली घटना कोंढाळीपासून तीन किलोमीटर अंतरावरील कचारी सावंगा येथे घडली. यश दिलीप युवनाते (वय ९) व राजेश मारोती युवनाते (वय ९) हे दोघे जाम नदीत येथे पोहायला गेले. पोहताना नदीत बुडून दोघांचा मृत्यू झाला. दुसरी घटना खापरखेड्यातील वलनी भागात धडली. कन्हान नदीत आंघोळ करताना बुडून जय दिलीप वर्मा (वय १५) याचा मृत्यू झाला. या प्रकरणी खापरखेडा पोलिसांनी आकस्मिक मृत्यूची नोंद केली आहे.

घरावर दगडफेक; युवकाला मारहाण

आरडा-ओरड करण्यास मनाई केल्याने सहा जणांनी घरावर दगडफेक करून विजय किशोर शितोळे (वय ३५) यांना मारहाण केली. ही घटना मंगळवारी रात्री ११.३० वाजताच्या सुमारास नवीन बाबुळखेडा येथे घडली. याप्रकरणी अजनी पोलिसांनी शानू कैलास येडकर, गौरवर मन्सीराम घरजाळे, समीर जमाल खान, भावेश विनायक उज्जैनकर, फैजान इकबाल शेख व रमन रमेश गायकवाड या सहा जणांविरुद्ध गैरकायद्याची मंडळी जमवून मारहाण केल्याचा गुन्हा दाखल केला. समीर खान याचा वाढदिवस होता. त्याचे सहकारी वाढदिवस साजरा करताना आरडाओरड करीत होते. विजय यांच्या वडिलांनी त्यांना ओरडण्यास मनाई केली. त्यामुळे संतप्त होऊन सहा जणांनी घरावर दगडफेक करून विजय यांना मारहाण केली.

त्रिमूर्तीनगरमध्ये घरफोडी

त्रिमूर्तीनगरमधील भाग्यश्री ले-आऊट येथील धनराज सुभाष मोटघरे (वय ६९) यांच्याकडे घरफोडी करून चोरट्यांनी अडीच लाखांचे दागिने लंपास केले. ही घटना ९ जूनला सकाळी उघडकीस आली. ३ मार्चला मोटघरे कुटुंबासह पुणे येथील मुलाकडे गेले. लॉकडाउनमुळे ते तेथेच थांबले. संधी साधून चोरट्याने दरवाजाचे कुलूप तोडले. आलमारीतील दागिने चोरी केले. याप्रकरणी प्रतापनगर पोलिसांनी घरफोडीचा गुन्हा दाखल केला आहे.

गळफास घेतला

पाटीदार भवन परिसरात राहणाऱ्या ४० वर्षीय इसमाने पंख्याला ओढणी बांधून गळफास घेतला. ही घटना बुधवारी दुपारी उघडकीस आली. कमलेश गरीबदास लोणारे, असे मृताचे नाव आहे. त्यांच्या आत्महत्येचे कारण कळू शकले नाही. लकडगंज पोलिसांनी आकस्मिक मृत्यूची नोंद केली आहे.

कामगाराचा मृत्यू

फ्रेण्ड्स कॉलनीतील सायकल दुरुस्ती दुकानात काम करताना कामगाराचा मृत्यू झाला. ही घटना बुधवारी दुपारी १ वाजताच्या सुमारास घडली. अलीम खान नूर खन (वय ५५, रा. न्यू शांतीनगर), असे मृताचे नाव आहे. गिट्टीखदान पोलिसांनी आकस्मिक मृत्यूची नोंद करून तपास सुरू केला आहे.



Source link

LEAVE A REPLY

Please enter your comment!
Please enter your name here

Most Popular

Recent Comments